teri justuju teri aarzu mujhe kaam tere hi kaam se

tirī justujū tirī aarzū mujhe kaam tere hī kaam se

tū hī zindagī kā hai mudda.ā mirā naam tere hī naam se

tirā husn hai mirī zindagī tirā ishq hai mirī āshiqī

tirī fikr hai mirī shā.irī tirā zikr mere kalām se

tire husn ne ye ġhazab kiyā ki har ahl-e-dil huā mubtalā

jise dekhā terā hī said thā na koī bachā tire daam se

ga.ī aadhī raat guzar magar na to aa.e ḳhud na lī kuchh ḳhabar

maiñ taḌap rahā huuñ idhar udhar yūñhī intizār meñ shaam se

mire dilrubā mire dilrubā na ye lutf hai na koī atā

agar aanā hai to phir aa bhī jā na yuuñ jhāñk rauzan-e-bām se

ye ġhalat hai kufr hai sāqiyā mujhe terā hī rahā aasrā

tū pilā pilā tū pilā pilā nahīñ ijtināb harām se

maiñ vo tishna-lab huuñ ki sāqiyā hai azal se ḳhushk mirā galā

na zabāñ ko mai kā milā mazā na lab-āshnā hue jaam se

tirā soz-e-ishq hai zindagī tirā jazb-e-husn hai be-ḳhudī

tujhe pā ke ḳhush hai tirā 'zakī' nahīñ kaam aish-e-davām se

teri justuju teri aarzu mujhe kaam tere hi kaam se

tu hi zindagi ka hai muddaa mera nam tere hi nam se

tera husn hai meri zindagi tera ishq hai meri aashiqi

teri fikr hai meri shairi tera zikr mere kalam se

tere husn ne ye ghazab kiya ki har ahl-e-dil hua mubtala

jise dekha tera hi said tha na koi bacha tere dam se

gai aadhi raat guzar magar na to aae KHud na li kuchh KHabar

main taDap raha hun idhar udhar yunhi intizar mein sham se

mere dilruba mere dilruba na ye lutf hai na koi ata

agar aana hai to phir aa bhi ja na yun jhank rauzan-e-baam se

ye ghalat hai kufr hai saqiya mujhe tera hi raha aasra

tu pila pila tu pila pila nahin ijtinab haram se

main wo tishna-lab hun ki saqiya hai azal se KHushk mera gala

na zaban ko mai ka mila maza na lab-ashna hue jam se

tera soz-e-ishq hai zindagi tera jazb-e-husn hai be-KHudi

tujhe pa ke KHush hai tera 'zaki' nahin kaam aish-e-dawam se