teri kaamyabi meri kaamyabi barabar nahin

tirī kāmyābī mirī kāmyābī barābar nahīñ

yahāñ tak pahuñchne meñ mehnat hai merī muqaddar nahīñ

ḳhudā ne yahāñ kaise-kaisoñ kī jholī meñ kyā kyā diyā

hameñ maut ke vaqt bhī terī bāheñ mayassar nahīñ

use apnī ġhaltī ka ehsās hotā rahā 'umr-bhar

maiñ ruḳhsat huā thā use chuum kar laḌ-jhagaḌ kar nahīñ

ujālā banānā to thā par añdherā miTānā na thā

nayā 'ishq karnā thā lekin purānā bhulā kar nahīñ

isī nām-o-sūrat ka ik shaḳhs is ghar meñ rahtā to hai

magar DhūñDhtī ho jise tum vo 'arse se ghar par nahīñ

teri kaamyabi meri kaamyabi barabar nahin

yahan tak pahunchne mein mehnat hai meri muqaddar nahin

KHuda ne yahan kaise-kaison ki jholi mein kya kya diya

hamein maut ke waqt bhi teri bahen mayassar nahin

use apni ghalti ka ehsas hota raha 'umr-bhar

main ruKHsat hua tha use chum kar laD-jhagaD kar nahin

ujala banana to tha par andhera miTana na tha

naya 'ishq karna tha lekin purana bhula kar nahin

isi nam-o-surat ka ek shaKHs is ghar mein rahta to hai

magar DhunDhti ho jise tum wo 'arse se ghar par nahin