teri KHushbu tera lahja main kahan se laun

tirī ḳhushbū tirā lahja maiñ kahāñ se lā.ūñ

tū batā de tire jaisā maiñ kahāñ se lā.ūñ

chāñd ko gher ke rakhte haiñ sitāre har shab

phir bhalā chāñd ko tanhā maiñ kahāñ se lā.ūñ

chashm-e-tar meñ bhī rahe aur bharam bhī rakh le

aisā Thahrā huā dariyā maiñ kahāñ se lā.ūñ

us kī ḳhvāhish hai ta.alluq kā koī naam na ho

aisā be-nām sā rishta maiñ kahāñ se lā.ūñ

jazb kar le mujhe ḳhud meñ jo samā le mujh ko

ḳhushkiyoñ meñ vo jazīra maiñ kahāñ se lā.ūñ

khīñch laa.e jo gunāhoñ ke samundar se mujhe

ik nadāmat kā vo qatra maiñ kahāñ se lā.ūñ

teri KHushbu tera lahja main kahan se laun

tu bata de tere jaisa main kahan se laun

chand ko gher ke rakhte hain sitare har shab

phir bhala chand ko tanha main kahan se laun

chashm-e-tar mein bhi rahe aur bharam bhi rakh le

aisa Thahra hua dariya main kahan se laun

us ki KHwahish hai talluq ka koi nam na ho

aisa be-nam sa rishta main kahan se laun

jazb kar le mujhe KHud mein jo sama le mujh ko

KHushkiyon mein wo jazira main kahan se laun

khinch lae jo gunahon ke samundar se mujhe

ek nadamat ka wo qatra main kahan se laun