teri KHushi na mili mujhko tera gham bhi nahin

tirī ḳhushī na milī mujh ko terā ġham bhī nahīñ

hayāt kyā hai mirī ab qazā se kam bhī nahīñ

ye kis maqām pe saaqī ne lā ke chhoḌā hai

nahīñ hai sāġhar-e-jam to yahāñ pe sam bhī nahīñ

hai mere zarf meñ jitnā bharā vo paimāna

sharāb us meñ hai jo us meñ koī dam bhī nahīñ

utaar letā maiñ saare ġhamoñ kā us se nasha

harīf-e-ġham kā ho aisā ye jām-e-jam bhī nahīñ

javān-sāl huuñ mujh ko na shān-e-pīrī de

siyāh-rīsh abhī huuñ kamar meñ ḳham bhī nahīñ

tire alam ne kiyā hai 'asar' ko pazhmurda

milā.ūñ ziist se āñkheñ ab itnā dam bhī nahīñ

teri KHushi na mili mujh ko tera gham bhi nahin

hayat kya hai meri ab qaza se kam bhi nahin

ye kis maqam pe saqi ne la ke chhoDa hai

nahin hai saghar-e-jam to yahan pe sam bhi nahin

hai mere zarf mein jitna bhara wo paimana

sharab us mein hai jo us mein koi dam bhi nahin

utar leta main sare ghamon ka us se nasha

harif-e-gham ka ho aisa ye jam-e-jam bhi nahin

jawan-sal hun mujh ko na shan-e-piri de

siyah-rish abhi hun kamar mein KHam bhi nahin

tere alam ne kiya hai 'asar' ko pazhmurda

milaun zist se aankhen ab itna dam bhi nahin