تری محفل میں جو آتا ہے بیتابانہ آتا ہے

تری محفل میں جو آتا ہے بیتابانہ آتا ہے

شرار شمع بن بن کر یہاں پروانہ آتا ہے

جب آتی ہے تو پھر کب ہوش دیوانہ میں آتا ہے

تمہاری یاد کو بھی ناز معشوقانہ آتا ہے

عجب انداز ہے ساقی لئے مے خانہ آتا ہے

مزے کا وقت اب اے لغزش مستانہ آتا ہے

تڑپ کر شمع پر جیسے کوئی پروانہ آتا ہے

حسینوں پر یوں ہی میرا دل دیوانہ آتا ہے

نہ یہ اودی گھٹائیں ہیں نہ ساقی تخت پریوں کے

ہوا کے دوش پر اڑتا ہوا مے خانہ آتا ہے

یہ بت آنکھوں میں پھرتے ہیں کدھر سجدہ کروں یا رب

حرم کے سامنے مجھ کو نظر بت خانہ آتا ہے

بلا میری جلائے شمع محفل جل کے کہتی ہے

خود اپنی آگ میں جلتا ہوا پروانہ آتا ہے

مرے پہلو میں سو جاؤ نہیں یہ وقت جانے کا

نسیم صبح کے لب پر مرا افسانہ آتا ہے

زبان حال سے کہتی ہے جل کر شمع محفل میں

پرائی آگ میں جلنے کو کیوں پروانہ آتا ہے

جہاں ذکر وفا آیا مجھے بھی یاد کرتے ہیں

زباں پر بے وفاؤں کے مرا افسانہ آتا ہے

یہ کس بے درد کو دل کی خلش کا حال لکھتا ہوں

زبان کلک پر ہر حرف بیتابانہ آتا ہے

جنوں افزا ہوا تھی کیا شباب فتنہ ساماں کی

بہار آخر ہے اب کچھ ہوش میں دیوانہ آتا ہے

بسائیں گے نیا گھر بس یہی تعبیر ہے اس کی

کئی دن سے ہمارے خواب میں ویرانہ آتا ہے

تصدق ساغر جم بھی مرے جام سفالیں پر

لبوں تک میرے ساقی کے یہی پیمانہ آتا ہے

پنہانے کو کفن احباب لاتے ہیں زہے قسمت

مبارک اے اجل اب خلعت شاہانہ آتا ہے

مرے کام آ گئی آخر مری دیوانگی صفدرؔ

کسی کا ناز سے کہنا مرا دیوانہ آتا ہے