teri mahfil mein jo aata hai betabana aata hai

tirī mahfil meñ jo aatā hai betābāna aatā hai

sharār-e-sham.a ban ban kar yahāñ parvāna aatā hai

jab aatī hai to phir kab hosh dīvāne meñ aatā hai

tumhārī yaad ko bhī nāz-e-ma.ashūqāna aatā hai

ajab andāz hai saaqī liye mai-ḳhāna aatā hai

maze kā vaqt ab ai laġhzish-e-mastāna aatā hai

taḌap kar sham.a par jaise koī parvāna aatā hai

hasīnoñ par yūñhī merā dil-e-dīvāna aatā hai

na ye uudī ghaTā.eñ haiñ na saaqī taḳht pariyoñ ke

havā ke dosh par uḌtā huā mai-ḳhāna aatā hai

ye but āñkhoñ meñ phirte haiñ kidhar sajda karūñ yā-rab

haram ke sāmne mujh ko nazar but-ḳhāna aatā hai

balā merī jalā.e sham-e-mahfil jal ke kahtī hai

ḳhud apnī aag meñ jaltā huā parvāna aatā hai

mire pahlū meñ so jaao nahīñ ye vaqt jaane kā

nasīm-e-sub.h ke lab par mirā afsāna aatā hai

zabān-e-hāl se kahtī hai jal kar sham.a mahfil meñ

parā.ī aag meñ jalne ko kyoñ parvāna aatā hai

jahāñ zikr-e-vafā aaya mujhe bhī yaad karte haiñ

zabāñ par be-vafāoñ ke mirā afsāna aatā hai

ye kis be-dard ko dil kī ḳhalish kā haal likhtā huuñ

zabān-e-kilk par har harf betābāna aatā hai

junūñ-afzā havā thī kyā shabāb-e-fitna-sāmāñ kī

bahār āḳhir hai ab kuchh hosh meñ dīvāna aatā hai

basā.eñge nayā ghar bas yahī ta.abīr hai is kī

ka.ī din se hamāre ḳhvāb meñ vīrāna aatā hai

tasadduq sāġhar-e-jam bhī mire jām-e-sifālīñ par

laboñ tak mere saaqī ke yahī paimāna aatā hai

pinhāne ko kafan ahbāb laate haiñ zahe qismat

mubārak ai ajal ab ḳhil.at-e-shāhāna aatā hai

mire kaam aa ga.ī āḳhir mirī dīvāngī 'safdar'

kisī kā naaz se kahnā mirā dīvāna aatā hai

teri mahfil mein jo aata hai betabana aata hai

sharar-e-shama ban ban kar yahan parwana aata hai

jab aati hai to phir kab hosh diwane mein aata hai

tumhaari yaad ko bhi naz-e-mashuqana aata hai

ajab andaz hai saqi liye mai-KHana aata hai

maze ka waqt ab ai laghzish-e-mastana aata hai

taDap kar shama par jaise koi parwana aata hai

hasinon par yunhi mera dil-e-diwana aata hai

na ye udi ghaTaen hain na saqi taKHt pariyon ke

hawa ke dosh par uDta hua mai-KHana aata hai

ye but aankhon mein phirte hain kidhar sajda karun ya-rab

haram ke samne mujh ko nazar but-KHana aata hai

bala meri jalae sham-e-mahfil jal ke kahti hai

KHud apni aag mein jalta hua parwana aata hai

mere pahlu mein so jao nahin ye waqt jaane ka

nasim-e-subh ke lab par mera afsana aata hai

zaban-e-haal se kahti hai jal kar shama mahfil mein

parai aag mein jalne ko kyon parwana aata hai

jahan zikr-e-wafa aaya mujhe bhi yaad karte hain

zaban par be-wafaon ke mera afsana aata hai

ye kis be-dard ko dil ki KHalish ka haal likhta hun

zaban-e-kilk par har harf betabana aata hai

junun-afza hawa thi kya shabab-e-fitna-saman ki

bahaar aaKHir hai ab kuchh hosh mein diwana aata hai

basaenge naya ghar bas yahi tabir hai is ki

kai din se hamare KHwab mein virana aata hai

tasadduq saghar-e-jam bhi mere jam-e-sifalin par

labon tak mere saqi ke yahi paimana aata hai

pinhane ko kafan ahbab late hain zahe qismat

mubarak ai ajal ab KHilat-e-shahana aata hai

mere kaam aa gai aaKHir meri diwangi 'safdar'

kisi ka naz se kahna mera diwana aata hai