teri mahfil se jab uTh kar tera diwana aata hai

tirī mahfil se jab uTh kar tirā dīvāna aatā hai

kabhī ta.azīm ko ka.aba kabhī but-ḳhāna aatā hai

kiyā karte haiñ farzāne bhī uTh kar ehtirām us kā

tumhārī bazm meñ jab bhī koī dīvāna aatā hai

havas vaale tirī mahfil meñ kab tak baiTh sakte haiñ

vo uTh jaate haiñ sū-e-sham.a jab parvāna aatā hai

dikhā detā hai tūfāñ sab ko dariyā-e-haqīqat kā

kabhī jab mauj par apnī tirā dīvāna aatā hai

ḳhudā ko be-ḳhabar apnī asīrī se kahūñ kyūñ-kar

qafas meñ mujh se pahle merā āb-o-dāna aatā hai

hamāre muñh se kyā kyā be-takalluf phuul jhaḌte haiñ

zabāñ par jab kabhī zikr-e-ruḳh-e-jānāna aatā hai

use chhoḌe hue muddat huī hai ai haram vaalo

na jaane yaad ab tak kyuuñ mujhe but-ḳhāna aatā hai

tirī mahfil meñ sab ai sham.a aate haiñ tamāshā.ī

aqīdat se koī aatā hai to parvāna aatā hai

hamārī bāda-ḳhvārī bhī hai 'sāhir' rashk ke qābil

na pahuñcheñ ham agar chal kar yahāñ mai-ḳhāna aatā hai

teri mahfil se jab uTh kar tera diwana aata hai

kabhi tazim ko kaba kabhi but-KHana aata hai

kiya karte hain farzane bhi uTh kar ehtiram us ka

tumhaari bazm mein jab bhi koi diwana aata hai

hawas wale teri mahfil mein kab tak baiTh sakte hain

wo uTh jate hain su-e-shama jab parwana aata hai

dikha deta hai tufan sab ko dariya-e-haqiqat ka

kabhi jab mauj par apni tera diwana aata hai

KHuda ko be-KHabar apni asiri se kahun kyun-kar

qafas mein mujh se pahle mera aab-o-dana aata hai

hamare munh se kya kya be-takalluf phul jhaDte hain

zaban par jab kabhi zikr-e-ruKH-e-jaanana aata hai

use chhoDe hue muddat hui hai ai haram walo

na jaane yaad ab tak kyun mujhe but-KHana aata hai

teri mahfil mein sab ai shama aate hain tamashai

aqidat se koi aata hai to parwana aata hai

hamari baada-KHwari bhi hai 'sahir' rashk ke qabil

na pahunchen hum agar chal kar yahan mai-KHana aata hai