teri mahfil tere kuche ka pata yaad nahin

tirī mahfil tire kūche kā patā yaad nahīñ

phir bhī jiite haiñ ki marne kī adā yaad nahīñ

maiñ to chhoḌ aaya thā ik bhiiḌ sar-e-rāh-e-vafā

kaun kis moḌ se kab lauT gayā yaad nahīñ

aaj dil par tapish-e-asr-e-ravāñ taarī hai

aaj us shoḳh kī āñchal kī havā yaad nahīñ

lazzat-e-zaḳhm-e-jigar talḳhī-e-sahbā-e-junūñ

ab koī chiiz tire ġham ke sivā yaad nahīñ

zehn be-āb chaTānoñ kī tarah jaltā hai

tirī zulfeñ tirī zulfoñ kī ghaTā yaad nahīñ

aap ne ḳhud ko batāyā thā masīh-e-daurāñ

aap ko bhī mire zaḳhmoñ kī davā yaad nahīñ

thī jab ik dhuum hadīs-e-lab-o-gesū 'ishrat'

vo zamāne vo fazā.eñ ba-ḳhudā yaad nahīñ

teri mahfil tere kuche ka pata yaad nahin

phir bhi jite hain ki marne ki ada yaad nahin

main to chhoD aaya tha ek bhiD sar-e-rah-e-wafa

kaun kis moD se kab lauT gaya yaad nahin

aaj dil par tapish-e-asr-e-rawan tari hai

aaj us shoKH ki aanchal ki hawa yaad nahin

lazzat-e-zaKHm-e-jigar talKHi-e-sahba-e-junun

ab koi chiz tere gham ke siwa yaad nahin

zehn be-ab chaTanon ki tarah jalta hai

teri zulfen teri zulfon ki ghaTa yaad nahin

aap ne KHud ko bataya tha masih-e-dauran

aap ko bhi mere zaKHmon ki dawa yaad nahin

thi jab ek dhum hadis-e-lab-o-gesu 'ishrat'

wo zamane wo fazaen ba-KHuda yaad nahin