تری محفل ترے کوچے کا پتا یاد نہیں

تری محفل ترے کوچے کا پتا یاد نہیں

پھر بھی جیتے ہیں کہ مرنے کی ادا یاد نہیں

میں تو چھوڑ آیا تھا اک بھیڑ سر راہ وفا

کون کس موڑ سے کب لوٹ گیا یاد نہیں

آج دل پر تپش عصر رواں طاری ہے

آج اس شوخ کی آنچل کی ہوا یاد نہیں

لذت زخم جگر تلخئ صہبائے جنوں

اب کوئی چیز ترے غم کے سوا یاد نہیں

ذہن بے آب چٹانوں کی طرح جلتا ہے

تری زلفیں تری زلفوں کی گھٹا یاد نہیں

آپ نے خود کو بتایا تھا مسیح دوراں

آپ کو بھی مرے زخموں کی دوا یاد نہیں

تھی جب اک دھوم حدیث لب و گیسو عشرتؔ

وہ زمانے وہ فضائیں بخدا یاد نہیں