teri mohabbat mein gham jo aae to us se baDh kar KHushi nahin hai

tirī mohabbat meñ ġham jo aa.e to us se baḌh kar ḳhushī nahīñ hai

vafā kī manzil ke ḳhaar meñ bhī guloñ se kam dil-kashī nahīñ hai

na tujh meñ jur.at hai riñd kī sī na tujh meñ vus.at dil-o-nazar kī

aziim shai hai ye rasm-e-rindī ye sirf bāda-kashī nahīñ hai

libās-e-nau meñ havas ne aa kar mazāq-e-husn-o-nazar haiñ badle

vo ishq meñ hai na sarfaroshī vo husn meñ dilbarī nahīñ hai

tujhī se garmī thī mahfiloñ kī tujhī se thī vo chaman kī saireñ

nahīñ vo mahfil meñ lutf baaqī guloñ ke lab par hañsī nahīñ hai

nahīñ ye mumkin ki us ke dar se tū ḳhālī dāman hī lauT jaa.e

talab hī terī hai ḳhaam ab tak nazar bhī dar par jamī nahīñ hai

ḳhirad kī go haiñ hazār āñkheñ hai dil kī sirf ek aañkh lekin

jo dil kī bujh jaa.e sham-e-ulfat to phir kahīñ raushnī nahīñ hai

ġham-āshnā terā dil nahīñ hai to aa.e us meñ gudāz kaise

jo saaz dil kā nahīñ hai TuuTā to us meñ phir naġhmagī nahīñ hai

karoge kyā tum 'habīb' āḳhir hayāt-e-tūl-o-tavīl le kar

tabassum-e-gul ke ek lamhe meñ kyā koī zindagī nahīñ hai

teri mohabbat mein gham jo aae to us se baDh kar KHushi nahin hai

wafa ki manzil ke KHar mein bhi gulon se kam dil-kashi nahin hai

na tujh mein jurat hai rind ki si na tujh mein wusat dil-o-nazar ki

azim shai hai ye rasm-e-rindi ye sirf baada-kashi nahin hai

libas-e-nau mein hawas ne aa kar mazaq-e-husn-o-nazar hain badle

wo ishq mein hai na sarfaroshi wo husn mein dilbari nahin hai

tujhi se garmi thi mahfilon ki tujhi se thi wo chaman ki sairen

nahin wo mahfil mein lutf baqi gulon ke lab par hansi nahin hai

nahin ye mumkin ki us ke dar se tu KHali daman hi lauT jae

talab hi teri hai KHam ab tak nazar bhi dar par jami nahin hai

KHirad ki go hain hazar aankhen hai dil ki sirf ek aankh lekin

jo dil ki bujh jae sham-e-ulfat to phir kahin raushni nahin hai

gham-ashna tera dil nahin hai to aae us mein gudaz kaise

jo saz dil ka nahin hai TuTa to us mein phir naghmagi nahin hai

karoge kya tum 'habib' aaKHir hayat-e-tul-o-tawil le kar

tabassum-e-gul ke ek lamhe mein kya koi zindagi nahin hai