teri rah dekhta main but-e-bewafa kahan tak

tirī raah dekhtā maiñ but-e-bevafā kahāñ tak

tirā intizār maiñ ne kiyā sub.h kī azaañ tak

vahī rāhzan jinhoñ ne mire kārvāñ ko luuTā

ba-ḳhudā unhī meñ shāmil hai amīr-e-kārvāñ tak

na use agar bujhāyā to chaman ko phūñk degī

yahī aag jo abhī hai mirī shāḳh-e-āshiyāñ tak

kisī koh par guzartī to vo reza reza hotā

jo mire chaman pe guzrī hai bahār se ḳhizāñ tak

tirā dil bhī jāntā hai koī rabt hai yaqīnan

tire qahqahoñ se le kar mire nāla-o-fuġhāñ tak

mujhe saañp ban ke Dasne vahāñ shāḳh shāḳh lapkī

maiñ gayā jo fasl-e-gul meñ kabhī sehn-e-gulsitāñ tak

mire ishq kā fasāna mire pyaar kī kahānī

vo hai ab zabāñ zabāñ par jo kabhī thī rāz-dāñ tak

ye mirā vajūd 'salmāñ' hai nishāñ kisī ke ġham kā

maiñ kisī kā ho gayā jab na rahā mirā nishāñ tak

teri rah dekhta main but-e-bewafa kahan tak

tera intizar main ne kiya subh ki azan tak

wahi rahzan jinhon ne mere karwan ko luTa

ba-KHuda unhi mein shamil hai amir-e-karwan tak

na use agar bujhaya to chaman ko phunk degi

yahi aag jo abhi hai meri shaKH-e-ashiyan tak

kisi koh par guzarti to wo reza reza hota

jo mere chaman pe guzri hai bahaar se KHizan tak

tera dil bhi jaanta hai koi rabt hai yaqinan

tere qahqahon se le kar mere nala-o-fughan tak

mujhe sanp ban ke Dasne wahan shaKH shaKH lapki

main gaya jo fasl-e-gul mein kabhi sehn-e-gulsitan tak

mere ishq ka fasana mere pyar ki kahani

wo hai ab zaban zaban par jo kabhi thi raaz-dan tak

ye mera wajud 'salman' hai nishan kisi ke gham ka

main kisi ka ho gaya jab na raha mera nishan tak