تری سادہ دلی کا آئنہ ہوں

تری سادہ دلی کا آئنہ ہوں

کہ اپنا آپ ارپن کر چکا ہوں

میں اپنے جسم پر بارود باندھے

تمہاری راہ میں کب سے کھڑا ہوں

پریشاں کرنے والے میٹھے خوابو

ابھی کچھ دیر ٹھہرو سو رہا ہوں

ذرا دیکھو میں اک کچھوے کی صورت

خود اپنے خول کے اندر چھپا ہوں

کسی پھل دار ٹہنی کی طرح اب

میں اپنے بوجھ سے ہی جھک گیا ہوں

تری دہلیز پر صدیوں سے یوں ہی

میں ساری رات جلتا ہوں دیا ہوں

میں کس کس کو جواباً عرض کر لوں

کہ انجام محبت جانتا ہوں

مری ہر بات کو رد کر چکا ہے

میں منصف کو دعائیں بھیجتا ہوں

میری نیت ہی ایرجؔ صاف کب ہے

نہ انساں ہوں نہ ہی انساں نما ہوں