teri surat mein wo jalwa dikha kar

tirī sūrat meñ vo jalva dikhā kar

rakhā hai mujh ko dīvāna banā kar

sadā-e-sarmadī apnā sunā kar

kiyā hushiyār dīvāna banā kar

kiyā behosh muusā ko bulā kar

tajallī tuur par apnī dikhā kar

baḌī mushkil se samjhā kar manā kar

use dil meñ rakhā mehmāñ banā kar

sabā lillah ye musht-e-ḳhāk merī

zarā le chal madīne tak uḌā kar

agar hogī madīne tak rasā.ī

karūñgā arz dard-e-dil sunā kar

mire maulā mire sarkār lillāh

rakho mujh ko madīne meñ bulā kar

karūñgā un kī zulf-e-ambarīñ meñ

dil-e-sad-chāk ko shāna banā kar

nazar aa jaa.eñ jab vo shāh-e-ḳhūbāñ

rakhūñgā apnī āñkhoñ meñ chhupā kar

uTheñge ham na hargiz tā-qayāmat

dar-e-mahbūb par aasan jamā kar

guzartī thī kisī aalam meñ achchhī

hue badnām is aalam meñ aa kar

nazar bhar kar abhī dekhā nahīñ thā

kiyā bismil mujhe āñkheñ dikhā kar

makāñ meñ mere jis din ā.eñge vo

bulā.ūñgā unheñ āñkheñ bichhā kar

na aanā thā tumheñ pahle hī bāhar

chhupe phir kis liye sūrat batā kar

alag ho kar tamāshā dekhte ho

hameñ duniyā ke jhagḌoñ meñ phañsā kar

muqābil apne tasvīr-e-mohammad

lagā rakkhī hai ā.īna banā kar

rahe daa.im salāmat dīn-o-īmāñ

vo but kahtā hai mujh se yuuñ duā kar

'qamar' apnī haqīqat ko samajh kar

use dekho ḳhudī apnī miTā kar

teri surat mein wo jalwa dikha kar

rakha hai mujh ko diwana bana kar

sada-e-sarmadi apna suna kar

kiya hushiyar diwana bana kar

kiya behosh musa ko bula kar

tajalli tur par apni dikha kar

baDi mushkil se samjha kar mana kar

use dil mein rakha mehman bana kar

saba lillah ye musht-e-KHak meri

zara le chal madine tak uDa kar

agar hogi madine tak rasai

karunga arz dard-e-dil suna kar

mere maula mere sarkar lillah

rakho mujh ko madine mein bula kar

karunga un ki zulf-e-ambarin mein

dil-e-sad-chaak ko shana bana kar

nazar aa jaen jab wo shah-e-KHuban

rakhunga apni aankhon mein chhupa kar

uThenge hum na hargiz ta-qayamat

dar-e-mahbub par aasan jama kar

guzarti thi kisi aalam mein achchhi

hue badnam is aalam mein aa kar

nazar bhar kar abhi dekha nahin tha

kiya bismil mujhe aankhen dikha kar

makan mein mere jis din aaenge wo

bulaunga unhen aankhen bichha kar

na aana tha tumhein pahle hi bahar

chhupe phir kis liye surat bata kar

alag ho kar tamasha dekhte ho

hamein duniya ke jhagDon mein phansa kar

muqabil apne taswir-e-mohammad

laga rakkhi hai aaina bana kar

rahe daim salamat din-o-iman

wo but kahta hai mujh se yun dua kar

'qamar' apni haqiqat ko samajh kar

use dekho KHudi apni miTa kar