teri talash mein guzre kai zamane mujhe

tirī talāsh meñ guzre ka.ī zamāne mujhe

ḳhudā hī jaane tū jaane hai yā na jaane mujhe

dhuāñ dhuāñ haiñ jahāñ par ḳhayāl kī rāheñ

misāl-e-gard uḌāyā tirī havā ne mujhe

na is tarah mujhe dekho ki jaise patthar huuñ

jo ho sake to pukāroñ kisī bahāne mujhe

vo baat baat pe hañsnā tirī adā hī sahī

tamām umr rulāyā hai is adā ne mujhe

lagā hai jab bhī koī zaḳhm muskurāyā huuñ

ye taab dī hai tire dard-e-lā-davā ne mujhe

tasavvurāt ke sahrā meñ jal bujhā huuñ 'salīm'

na chhāñv baḳhshī kisī husn-e-gul-ridā ne mujhe

teri talash mein guzre kai zamane mujhe

KHuda hi jaane tu jaane hai ya na jaane mujhe

dhuan dhuan hain jahan par KHayal ki rahen

misal-e-gard uDaya teri hawa ne mujhe

na is tarah mujhe dekho ki jaise patthar hun

jo ho sake to pukaron kisi bahane mujhe

wo baat baat pe hansna teri ada hi sahi

tamam umr rulaya hai is ada ne mujhe

laga hai jab bhi koi zaKHm muskuraya hun

ye tab di hai tere dard-e-la-dawa ne mujhe

tasawwuraat ke sahra mein jal bujha hun 'salim'

na chhanw baKHshi kisi husn-e-gul-rida ne mujhe