teri talash ne rakha hai dar-ba-dar mujhko

tirī talāsh ne rakhā hai dar-ba-dar mujh ko

tire sivā nahīñ aatā koī nazar mujh ko

maiñ Duub jaatā huuñ jab bhī tire tasavvur meñ

jahāñ kī phir nahīñ rahtī hai kuchh ḳhabar mujh ko

tū ham-qadam thā mirā zindagī kī rāhoñ meñ

kaThin lagā hī nahīñ thā kabhī safar mujh ko

nazar uThe hai jidhar bhī dayār-e-ulfat meñ

tirā hī jalva nazar aa.e hai udhar mujh ko

zamāñ-shanāsī to kuchh haisiyat nahīñ rakhtī

ki apne ghar kī nahīñ jab koī ḳhabar mujh ko

chamaktī dhuup meñ sab ke liye hai sāya-fagan

bashar se baḌh ke lage mehrbāñ shajar mujh ko

kahīñ bhī DhūñDe se miltā nahīñ surāġh koī

lage hai bhūlī huī dāstāñ bashar mujh ko

ki pattharoñ ke makāñ chāhtā nahīñ 'anvār'

mohabbatoñ se bharī ret kā de ghar mujh ko

teri talash ne rakha hai dar-ba-dar mujh ko

tere siwa nahin aata koi nazar mujh ko

main Dub jata hun jab bhi tere tasawwur mein

jahan ki phir nahin rahti hai kuchh KHabar mujh ko

tu ham-qadam tha mera zindagi ki rahon mein

kaThin laga hi nahin tha kabhi safar mujh ko

nazar uThe hai jidhar bhi dayar-e-ulfat mein

tera hi jalwa nazar aae hai udhar mujh ko

zaman-shanasi to kuchh haisiyat nahin rakhti

ki apne ghar ki nahin jab koi KHabar mujh ko

chamakti dhup mein sab ke liye hai saya-fagan

bashar se baDh ke lage mehrban shajar mujh ko

kahin bhi DhunDe se milta nahin suragh koi

lage hai bhuli hui dastan bashar mujh ko

ki pattharon ke makan chahta nahin 'anwar'

mohabbaton se bhari ret ka de ghar mujh ko