teri talash se mujhko kabhi mafar na mile

tirī talāsh se mujh ko kabhī mafar na mile

maiñ chāhtā huuñ mujhe terā sang-e-dar na mile

nafas nafas to mile vo nazar nazar na mile

vo umr bhar bhī mile aur umr bhar na mile

rulā.e jā ġham-e-furqat ba-shān-e-ḳhuddārī

vo haal pūchhne aa.eñ to aañkh tar na mile

hai dard-e-ishq hī dar-asl zindagī merī

ḳhudā kare mujhe ġham-ḳhvār-o-chārāgar na mile

hameñ tahayyur-e-jalva se ye huā mālūm

vahīñ vahīñ vo mile vo jidhar jidhar na mile

kisī ke zaḳhm unheñ dekhne kī taab nahīñ

ilāhī un ko mirī vus.at-e-nazar na mile

mire yaqīn ne kī merī rahbarī 'rif.at'

jo gumrahān-e-safar the vo rāhbar na mile

teri talash se mujh ko kabhi mafar na mile

main chahta hun mujhe tera sang-e-dar na mile

nafas nafas to mile wo nazar nazar na mile

wo umr bhar bhi mile aur umr bhar na mile

rulae ja gham-e-furqat ba-shan-e-KHuddari

wo haal puchhne aaen to aankh tar na mile

hai dard-e-ishq hi dar-asl zindagi meri

KHuda kare mujhe gham-KHwar-o-chaaragar na mile

hamein tahayyur-e-jalwa se ye hua malum

wahin wahin wo mile wo jidhar jidhar na mile

kisi ke zaKHm unhen dekhne ki tab nahin

ilahi un ko meri wusat-e-nazar na mile

mere yaqin ne ki meri rahbari 'rifat'

jo gumrahan-e-safar the wo rahbar na mile