teri taswir se rahmat barasti hai guru-nanak

tirī tasvīr se rahmat barastī hai gurū-nānak

kare tārīf terī kis kī hastī hai gurū-nānak

hameñ ummīd hai jaatī rahegī terī koshish se

hamāre mulk meñ jo tañg-dastī hai gurū-nānak

miTāyā naqsh tū ne dahr se bātil parastī kā

tire dam se zuhūr-e-haq barastī hai gurū-nānak

muḳhālif ko tire kyūñkar bulandī-e-marātib ho

baġhāvat se natīja us kā pastī hai gurū-nānak

ḳharīdārī na ho kyūñkar tire bāzār-e-talqīñ meñ

najāt-o-maġhfirat kī jins sastī hai gurū-nānak

banā.egī murīdoñ ko tire be-ḳhauf mahshar meñ

sharāb-e-nāb-e-vahdat se jo mastī hai gurū-nānak

hisāb-e-roz-e-mahshar se nahīñ kuchh 'barq' ko ḳhatra

jo terī yaad is ke dil meñ bastī hai gurū-nānak

teri taswir se rahmat barasti hai guru-nanak

kare tarif teri kis ki hasti hai guru-nanak

hamein ummid hai jati rahegi teri koshish se

hamare mulk mein jo tang-dasti hai guru-nanak

miTaya naqsh tu ne dahr se baatil parasti ka

tere dam se zuhur-e-haq barasti hai guru-nanak

muKHalif ko tere kyunkar bulandi-e-maraatib ho

baghawat se natija us ka pasti hai guru-nanak

KHaridari na ho kyunkar tere bazar-e-talqin mein

najat-o-maghfirat ki jins sasti hai guru-nanak

banaegi muridon ko tere be-KHauf mahshar mein

sharab-e-nab-e-wahdat se jo masti hai guru-nanak

hisab-e-roz-e-mahshar se nahin kuchh 'barq' ko KHatra

jo teri yaad is ke dil mein basti hai guru-nanak