teri tund-KHui teri kina-jui teri kaj-adai teri bewafai

tirī tund-ḳhūī tirī kīna-jūī tirī kaj-adā.ī tirī bevafā.ī

balā hai sitam hai ġhazab hai qayāmat duhā.ī duhā.ī duhā.ī duhā.ī

haqīqat ne chakkar meñ Daalā thā ham ko tarīqat bure vaqt par kaam aa.ī

hama-dast kā mas.ala jab hai aage to kaisī duī aur kaisī judā.ī

udhar paas chilman ke maujūd the vo idhar the pareshān un ke fidā.ī

rahā sharm-o-shoḳhī kā dilkash tamāshā na jalva dikhāyā na sūrat chhupā.ī

madad kar zarā aur ai josh-e-ulfat ki armān dil kā nikal jaa.e dil se

kabhī jalva-gah tak guzar ho hamārā abhī rahguzar tak huī hai rasā.ī

bharam khul gayā us se ayyāriyoñ kā khulā raaz bhī us se makkāriyoñ kā

churāyā thā tum ne agar dil hamārā to dil ko churā kar nazar kyuuñ churā.ī

udhar sab se parda idhar sab meñ jalva yahāñ vaar ‘ālim vahāñ aur manzar

kahīñ vo ayaañ hai kahīñ vo nihāñ hai kabhī husn-poshī kabhī ḳhud-numā.ī

jahāñ meñ bashar un se ho be-ta'alluq koī maan le ham na māneñge us ko

ki chāroñ taraf haiñ yahī chaar chīzeñ mohabbat adāvat bhalā.ī burā.ī

barābar haiñ dair-o-haram ke marātib masāvī haiñ donoñ gharoñ kī haqīqat

nahīñ farq kuchh bhī hamārī nazar meñ vahī but-parastī vahī jubba-sā.ī

jinheñ aish-o-rāhat kā armān hogā unheñ aish-o-rāhat kā armān hogā

tumhārī mohabbat meñ ham ne balā se vo paayā na paayā ye paa.ī na paa.ī

ye bartāv kyā haiñ ye atvār kyā haiñ zarā aap socheñ zarā aap samjheñ

hamīñ par kisī roz chashm-e-ināyat hamīñ se kisī vaqt be-e'tinā.ī

bahār aa.e muzhda masarrat kā le kar dhuāñ-dhār uTThīñ falak par ghaTā.eñ

idhar jaam chhalke udhar tauba TuuTe baham zohd-o-rindī meñ ho hāthā-pā.ī

agar ho koī rū-shanāsī kā tālib to pahle muqallid bane aa.ine kā

kudūrat se allāh mahfūz rakkhe baḌī shai hai duniyā meñ dil kī safā.ī

ye tauqīr-o-tahqīr meñ bahs kaisī ki haiñ donoñ bāteñ ḳhudā kī taraf se

vo raa.ī ko chāhe to parbat banā de vo parbat ko chāhe to ban jaa.e raa.ī

kisī ko rulāo kisī ko jalāo kisī ko satāo kisī ko miTāo

ḳhudā.ī kā ġham kyā zamāne kā Dar kyā tumhārā zamāna tumhārī ḳhudā.ī

hazāroñ bakheḌe hazāroñ jhamele hazāroñ tavahhum hazāroñ taraddud

magar aap aa.eñ to mehmān rakh luuñ mire dil meñ ab bhī hai utnī samā.ī

jo bande ḳhudā ke ḳhudā par na rakkheñ to rakkheñ bharosa ḳhudā.ī meñ kis par

banāyā unheñ ahl-e-hājat usī ne karegā vahī un kī hājat-ravā.ī

ye andher khātā ye kufrān-e-ne.amat zamāne ko ai 'nūh' kyā ho gayā hai

ḳhudā ke karam se to beḌā na Duube magar paa.e shohrat tirī nā-ḳhudā.ī

teri tund-KHui teri kina-jui teri kaj-adai teri bewafai

bala hai sitam hai ghazab hai qayamat duhai duhai duhai duhai

haqiqat ne chakkar mein Dala tha hum ko tariqat bure waqt par kaam aai

hama-dast ka masala jab hai aage to kaisi dui aur kaisi judai

udhar pas chilman ke maujud the wo idhar the pareshan un ke fidai

raha sharm-o-shoKHi ka dilkash tamasha na jalwa dikhaya na surat chhupai

madad kar zara aur ai josh-e-ulfat ki arman dil ka nikal jae dil se

kabhi jalwa-gah tak guzar ho hamara abhi rahguzar tak hui hai rasai

bharam khul gaya us se ayyariyon ka khula raaz bhi us se makkariyon ka

churaya tha tum ne agar dil hamara to dil ko chura kar nazar kyun churai

udhar sab se parda idhar sab mein jalwa yahan war ‘alim wahan aur manzar

kahin wo ayan hai kahin wo nihan hai kabhi husn-poshi kabhi KHud-numai

jahan mein bashar un se ho be-ta'alluq koi man le hum na manenge us ko

ki chaaron taraf hain yahi chaar chizen mohabbat adawat bhalai burai

barabar hain dair-o-haram ke maraatib masawi hain donon gharon ki haqiqat

nahin farq kuchh bhi hamari nazar mein wahi but-parasti wahi jubba-sai

jinhen aish-o-rahat ka arman hoga unhen aish-o-rahat ka arman hoga

tumhaari mohabbat mein hum ne bala se wo paya na paya ye pai na pai

ye bartaw kya hain ye atwar kya hain zara aap sochen zara aap samjhen

hamin par kisi roz chashm-e-inayat hamin se kisi waqt be-e'tinai

bahaar aae muzhda masarrat ka le kar dhuan-dhaar uTThin falak par ghaTaen

idhar jam chhalke udhar tauba TuTe baham zohd-o-rindi mein ho hatha-pai

agar ho koi ru-shanasi ka talib to pahle muqallid bane aaine ka

kudurat se allah mahfuz rakkhe baDi shai hai duniya mein dil ki safai

ye tauqir-o-tahqir mein bahs kaisi ki hain donon baaten KHuda ki taraf se

wo rai ko chahe to parbat bana de wo parbat ko chahe to ban jae rai

kisi ko rulao kisi ko jalao kisi ko satao kisi ko miTao

KHudai ka gham kya zamane ka Dar kya tumhaara zamana tumhaari KHudai

hazaron bakheDe hazaron jhamele hazaron tawahhum hazaron taraddud

magar aap aaen to mehman rakh lun mere dil mein ab bhi hai utni samai

jo bande KHuda ke KHuda par na rakkhen to rakkhen bharosa KHudai mein kis par

banaya unhen ahl-e-hajat usi ne karega wahi un ki hajat-rawai

ye andher khata ye kufran-e-neamat zamane ko ai 'nuh' kya ho gaya hai

KHuda ke karam se to beDa na Dube magar pae shohrat teri na-KHudai