teri wafa ka hua tha kabhi guman mujhko

tirī vafā kā huā thā kabhī gumāñ mujh ko

vahī ḳhayāl huā aish-e-jāvedāñ mujh ko

shikāyat-e-sitam-e-dushmanāñ maiñ kyā kartā

ki bhūltā hī nahīñ lutf-e-dostāñ mujh ko

tire jamāl kā zikr-e-jamīl maiñ kartā

na mil sakā koī aalam meñ rāz-dāñ mujh ko

na sañg-e-mīl na naqsh-e-qadam na rahbar hai

tirī talāsh ne gum kar diyā kahāñ mujh ko

tū ḳhud mile na mile justujū kī daad to de

nishāñ mirā bhī miTā de na de nishāñ mujh ko

zabān-e-sham.a se zāhir ho soz-e-parvāna

kuchh is tarah se jalā sozish-e-nihāñ mujh ko

talāsh-e-yār meñ khoyā rahā jo maiñ 'beḳhud'

huā na bār-e-ġham-e-do-jahāñ girāñ mujh ko

teri wafa ka hua tha kabhi guman mujh ko

wahi KHayal hua aish-e-jawedan mujh ko

shikayat-e-sitam-e-dushmanan main kya karta

ki bhulta hi nahin lutf-e-dostan mujh ko

tere jamal ka zikr-e-jamil main karta

na mil saka koi aalam mein raaz-dan mujh ko

na sang-e-mil na naqsh-e-qadam na rahbar hai

teri talash ne gum kar diya kahan mujh ko

tu KHud mile na mile justuju ki dad to de

nishan mera bhi miTa de na de nishan mujh ko

zaban-e-shama se zahir ho soz-e-parwana

kuchh is tarah se jala sozish-e-nihan mujh ko

talash-e-yar mein khoya raha jo main 'beKHud'

hua na bar-e-gham-e-do-jahan giran mujh ko