teri yaad hi meri ham-nafas meri umr bhar ka hisab hai

tirī yaad hī mirī ham-nafas mirī umr bhar kā hisāb hai

jo bigaḌ ga.ī to ajīb-tar jo sañvar ga.ī to kitāb hai

vahī kāvisheñ vahī justujū vahī shohrateñ vahī rang-o-bū

mire shauq-e-ḳhāna-ḳharāb kā na savāl hai na javāb hai

tire ishq se maiñ sañvar gayā tujhe bhuul kar maiñ rahā na kuchh

tujhe chāhnā to hai zindagī tujhe bhūlnā to azaab hai

jo falak ko chhūne chale to ham zamīñ kah uThī ki ai mohtaram

ye bulandī terī to ḳhvāb hai ye uḌaan terī sarāb hai

tirā har qadam 'sa.īd' imtihān tirā har amal tirā rahnumā

tire naqsh-e-pā ke hisār meñ tirī manziloñ kā hisāb hai

teri yaad hi meri ham-nafas meri umr bhar ka hisab hai

jo bigaD gai to ajib-tar jo sanwar gai to kitab hai

wahi kawishen wahi justuju wahi shohraten wahi rang-o-bu

mere shauq-e-KHana-KHarab ka na sawal hai na jawab hai

tere ishq se main sanwar gaya tujhe bhul kar main raha na kuchh

tujhe chahna to hai zindagi tujhe bhulna to azab hai

jo falak ko chhune chale to hum zamin kah uThi ki ai mohtaram

ye bulandi teri to KHwab hai ye uDan teri sarab hai

tera har qadam 'said' imtihan tera har amal tera rahnuma

tere naqsh-e-pa ke hisar mein teri manzilon ka hisab hai