تری یادیں ہیں اور تنہائیاں ہیں

تری یادیں ہیں اور تنہائیاں ہیں

غضب کی انجمن آرائیاں ہیں

کہاں ہم اور کہاں یہ لذت غم

یہ سب تیری کرم فرمائیاں ہیں

مہکتی ہے تری سانسوں کی خوشبو

جہاں تک روح کی گہرائیاں ہیں

میں راہ شوق میں تنہا نہیں ہوں

مرے ہم راہ کچھ پرچھائیاں ہیں

سر شام آج کیوں نیند آ رہی ہے

یہ کس کی یاد کی پروائیاں ہیں

اب اس احساس کو کیا نام دیجے

بھری محفل ہے اور تنہائیاں ہیں

وہاں ٹوٹے ہوئے دل بھی ملیں گے

جہاں بھی انجمن آرائیاں ہیں

کبھی دیکھا تھا ہم نے شانؔ ان کو

متاع دل وہی رعنائیاں ہیں