تری یادوں کے سائے میں ہمارے دن گزرتے ہیں

تری یادوں کے سائے میں ہمارے دن گزرتے ہیں

تجھے ہم چاہتے تھے کل تجھی پہ آج مرتے ہیں

محبت کا یہ رشتہ توڑنا آساں نہیں ہرگز

مگر حالات کی بازی گری سے ہم بھی ڈرتے ہیں

یہ بادل بھی گزر جاتے ہیں صحراؤں سے بن برسے

مگر سرسبز وادی میں یہ بے موسم برستے ہیں

ہمارے واسطے باد صبا بن کر وہ آئے گا

یہی ارماں لیے گن گن کے تارے صبح کرتے ہیں

اسی امید پر ہر موسم گل کو صدائیں دیں

نہ جانے کب ہماری زندگی کے دن سنورتے ہیں

مجیدؔ آساں نہیں ہے ان کے وعدوں کا وفا ہونا

جو خوشبو کی طرح اڑ کر فضاؤں میں بکھرتے ہیں