تری زمیں میں محبت کے بیج بو نہ سکوں

تری زمیں میں محبت کے بیج بو نہ سکوں

تو مل بھی جائے تو شاید میں تیرا ہو نہ سکوں

غم حیات تو چپکے سے خودکشی کر لے

میں اپنے ہاتھوں سے شاید تجھے ڈبو نہ سکوں

تمام اشک کسی اور کی امانت ہیں

اگر میں رونا بھی چاہوں تو کھل کے رو نہ سکوں

یہ بے وفائی تو پہلے سے میرے دھیان میں تھی

وہ داغ دے کہ جسے عمر بھر میں دھو نہ سکوں

تمام دن تجھے ڈھونڈھوں ترا پتہ نہ چلے

تمام رات اسی رنج میں میں سو نہ سکوں

تو اپنا غم بھی مجھے دے کہ رات دھل جائے

میں اپنی آنکھوں سے ممکن ہے اتنا رو نہ سکوں

شکیلؔ اس کو کسی نظم میں لکھوں گا کبھی

غزل کی آنکھ میں شاید اسے پرو نہ سکوں