teri zamin mein mohabbat ke bij bo na sakun

tirī zamīñ meñ mohabbat ke biij bo na sakūñ

tū mil bhī jaa.e to shāyad maiñ terā ho na sakūñ

ġham-e-hayāt tū chupke se ḳhud-kushī kar le

maiñ apne hāthoñ se shāyad tujhe Dubo na sakūñ

tamām ashk kisī aur kī amānat haiñ

agar maiñ ronā bhī chāhūñ to khul ke ro na sakūñ

ye bevafā.ī to pahle se mere dhyān meñ thī

vo daaġh de ki jise 'umr-bhar maiñ dho na sakūñ

tamām din tujhe DhūñDhuñ tirā pata na chale

tamām raat isī ranj meñ maiñ so na sakūñ

tū apnā ġham bhī mujhe de ki raat dhul jaa.e

maiñ apnī āñkhoñ se mumkin hai itnā ro na sakūñ

'shakīl' us ko kisī nazm meñ likhūñgā kabhī

ġhazal kī aañkh meñ shāyad use piro na sakūñ

teri zamin mein mohabbat ke bij bo na sakun

tu mil bhi jae to shayad main tera ho na sakun

gham-e-hayat tu chupke se KHud-kushi kar le

main apne hathon se shayad tujhe Dubo na sakun

tamam ashk kisi aur ki amanat hain

agar main rona bhi chahun to khul ke ro na sakun

ye bewafai to pahle se mere dhyan mein thi

wo dagh de ki jise 'umr-bhar main dho na sakun

tamam din tujhe DhunDhun tera pata na chale

tamam raat isi ranj mein main so na sakun

tu apna gham bhi mujhe de ki raat dhul jae

main apni aankhon se mumkin hai itna ro na sakun

'shakil' us ko kisi nazm mein likhunga kabhi

ghazal ki aankh mein shayad use piro na sakun