teri zulf ke pech-o-KHam dekhte hain

tirī zulf ke pech-o-ḳham dekhte haiñ

hamīñ jānte haiñ jo ham dekhte haiñ

ye hālat huī hai junūñ meñ hamārī

ḳhushī dekhte haiñ na ġham dekhte haiñ

bahut dekh lī hai zamāne kī gardish

muqaddar kā ab zer-o-bam dekhte haiñ

tasavvur meñ haiñ jin ke jalve tumhāre

vo husn-e-do-ālam ko kam dekhte haiñ

jhagaḌte haiñ shaiḳh-o-barahman magar ham

tamāshā-e-dair-o-haram dekhte haiñ

sar-e-bazm hai ehtiyāt aaj aisī

na tum dekhte ho na ham dekhte haiñ

kisī chashm-e-maigūñ meñ ham aaj 'rif.at'

chhalakte hue jām-e-jam dekhte haiñ

teri zulf ke pech-o-KHam dekhte hain

hamin jaante hain jo hum dekhte hain

ye haalat hui hai junun mein hamari

KHushi dekhte hain na gham dekhte hain

bahut dekh li hai zamane ki gardish

muqaddar ka ab zer-o-bam dekhte hain

tasawwur mein hain jin ke jalwe tumhaare

wo husn-e-do-alam ko kam dekhte hain

jhagaDte hain shaiKH-o-barahman magar hum

tamasha-e-dair-o-haram dekhte hain

sar-e-bazm hai ehtiyat aaj aisi

na tum dekhte ho na hum dekhte hain

kisi chashm-e-maigun mein hum aaj 'rifat'

chhalakte hue jam-e-jam dekhte hain