tishna-e-takmil hai wahshat ka afsana abhi

tishna-e-takmīl hai vahshat kā afsāna abhī

vāqif-e-sūd-o-ziyāñ hai terā dīvāna abhī

kyuuñ na ho qurbān sham-e-husn ke jalvoñ pe dil

apne jalvoñ se hai nā-vāqif ye parvāna abhī

gul charāġh-e-dair hai ḳhāmosh hai sham-e-haram

sāqiyā raushan hai tere dam se mai-ḳhāna abhī

yā tajallī tuur kī hai ḳhud hijāb-andar-hijāb

yā nahīñ zauq-e-nazar apnā kalīmāna abhī

duur hai manzil mirī ik jaam ai pīr-e-muġhāñ

raah meñ ā.eñge ka.aba aur but-ḳhāna abhī

dāstāñ 'mansūr' kī be-kaif ho saktī nahīñ

muddatoñ dohrā.egī duniyā ye afsāna abhī

tishna-e-takmil hai wahshat ka afsana abhi

waqif-e-sud-o-ziyan hai tera diwana abhi

kyun na ho qurban sham-e-husn ke jalwon pe dil

apne jalwon se hai na-waqif ye parwana abhi

gul charagh-e-dair hai KHamosh hai sham-e-haram

saqiya raushan hai tere dam se mai-KHana abhi

ya tajalli tur ki hai KHud hijab-andar-hijab

ya nahin zauq-e-nazar apna kalimana abhi

dur hai manzil meri ek jam ai pir-e-mughan

rah mein aaenge kaba aur but-KHana abhi

dastan 'mansur' ki be-kaif ho sakti nahin

muddaton dohraegi duniya ye afsana abhi