tishna-kaami mein riayat nahin karne wale

tishna-kāmī meñ ri'āyat nahīñ karne vaale

ham amānat meñ ḳhayānat nahīñ karne vaale

raushnī ham pe 'ināyat nahīñ karne vaalī

ham charāġhoñ se shikāyat nahīñ karne vaale

ham se ye kār-e-musāfat nahīñ hone vaalā

zindagī terī qayādat nahīñ karne vaale

ham se ayyām kī gardish nahīñ dekhī jaatī

ḳhair ham is kī vazāhat nahīñ karne vaale

hasb-e-maqdūr hameñ ḳhaak uḌānī hai so ham

jism-e-ḳhasta kī marammat nahīñ karne vaale

phir vahī ḳhvāb vahī zid nahīñ 'āqib-sābir'

ham usūloñ se baġhāvat nahīñ karne vaale

tishna-kaami mein ri'ayat nahin karne wale

hum amanat mein KHayanat nahin karne wale

raushni hum pe 'inayat nahin karne wali

hum charaghon se shikayat nahin karne wale

hum se ye kar-e-musafat nahin hone wala

zindagi teri qayaadat nahin karne wale

hum se ayyam ki gardish nahin dekhi jati

KHair hum is ki wazahat nahin karne wale

hasb-e-maqdur hamein KHak uDani hai so hum

jism-e-KHasta ki marammat nahin karne wale

phir wahi KHwab wahi zid nahin 'aqib-sabir'

hum usulon se baghawat nahin karne wale