tishna-lab dasht mein yun log satae gae the

tishna-lab dasht meñ yuuñ log satā.e ga.e the

maqtal-e-ishq meñ be-vaqt hī laa.e ga.e the

hasrat-e-dast-e-talab khulne kī sūrat na banī

āḳhirī saf meñ bahut duur biThā.e ga.e the

shiddat-e-vasl kī hiddat meñ jhulaste hī rahe

us kī jānib jo parinde bhī uḌaa.e ga.e the

takte rahte the kināre se musalsal donoñ

jaane dariyā meñ bhī kyā vaqt bahā.e ga.e the

ek to gard-e-safar aur siyah raat kā rang

rāste bhuul ga.e jo bhī dikhā.e ga.e the

dāstāñ kahte haiñ sarhad ke sabhī būḌhe shajar

vo jo ajdād ke hāthoñ se lagā.e ga.e the

tishna-lab dasht mein yun log satae gae the

maqtal-e-ishq mein be-waqt hi lae gae the

hasrat-e-dast-e-talab khulne ki surat na bani

aaKHiri saf mein bahut dur biThae gae the

shiddat-e-wasl ki hiddat mein jhulaste hi rahe

us ki jaanib jo parinde bhi uDae gae the

takte rahte the kinare se musalsal donon

jaane dariya mein bhi kya waqt bahae gae the

ek to gard-e-safar aur siyah raat ka rang

raste bhul gae jo bhi dikhae gae the

dastan kahte hain sarhad ke sabhi buDhe shajar

wo jo ajdad ke hathon se lagae gae the