تشنہ لب دشت میں یوں لوگ ستائے گئے تھے

تشنہ لب دشت میں یوں لوگ ستائے گئے تھے

مقتل عشق میں بے وقت ہی لائے گئے تھے

حسرت دست طلب کھلنے کی صورت نہ بنی

آخری صف میں بہت دور بٹھائے گئے تھے

شدت وصل کی حدت میں جھلستے ہی رہے

اس کی جانب جو پرندے بھی اڑائے گئے تھے

تکتے رہتے تھے کنارے سے مسلسل دونوں

جانے دریا میں بھی کیا وقت بہائے گئے تھے

ایک تو گرد سفر اور سیہ رات کا رنگ

راستے بھول گئے جو بھی دکھائے گئے تھے

داستاں کہتے ہیں سرحد کے سبھی بوڑھے شجر

وہ جو اجداد کے ہاتھوں سے لگائے گئے تھے