tishna-lab kahte rahe sunti rahi pyasi raat

tishna-lab kahte rahe suntī rahī pyāsī raat

subah tak chaltī rahī durd-e-tah-e-jām kī baat

ye havas-pesha havas-kār havas-ḳhū duniyā

ḳhuub hai jis meñ bhaTaktī hai guzargāh-e-najāt

paḌte hī dil pe kisī shoḳh nazar kā partav

jagmagāne lagī dhaḌkan to saje mahsūsāt

jagmagātī hai kiran dard kī dhaḌkan dhaḌkan

aap ko pesh karūñ pyaar kī rañgīñ sauġhāt

ik masīhā kī nishānī hai ye hañstā huā zaḳhm

ham ko darkār nahīñ marham-o-darmān-e-hayāt

vaqt zālim hai miTā detā hai shaddādoñ ko

aap kā zulm hai kyā aap kī kyā hai auqāt

jām-o-ā.īna yahī dil thā kisī din 'jāved'

us ne toḌā hai jise sañg-dilī se haihāt

tishna-lab kahte rahe sunti rahi pyasi raat

subah tak chalti rahi durd-e-tah-e-jam ki baat

ye hawas-pesha hawas-kar hawas-KHu duniya

KHub hai jis mein bhaTakti hai guzargah-e-najat

paDte hi dil pe kisi shoKH nazar ka partaw

jagmagane lagi dhaDkan to saje mahsusat

jagmagati hai kiran dard ki dhaDkan dhaDkan

aap ko pesh karun pyar ki rangin saughat

ek masiha ki nishani hai ye hansta hua zaKHm

hum ko darkar nahin marham-o-darman-e-hayat

waqt zalim hai miTa deta hai shaddadon ko

aap ka zulm hai kya aap ki kya hai auqat

jam-o-aina yahi dil tha kisi din 'jawed'

us ne toDa hai jise sang-dili se haihat