tishna-labon ki nazr ko saughat chahiye

tishna-laboñ kī nazr ko sauġhāt chāhiye

tere nisār thoḌī sī barsāt chāhiye

itnā bhī mai-kade pe na pahre biThā.iye

kuchh to ḳhayāl-e-ahl-e-ḳharābāt chāhiye

aapas kī guftugū meñ bhī kaTne lagī zabāñ

ab dostoñ se tark-e-mulāqāt chāhiye

muddat se chashm-o-dil meñ koī rābta nahīñ

kyā aur tujh ko gardish-e-hālāt chāhiye

kis kis ḳhudā ke sāmne sajda nahīñ kiyā

kuchh sharm kuchh to ābrū-e-zāt chāhiye

zikr-e-parī-vashāñ ke zamāne guzar ga.e

ab to ġhazal meñ hamd-o-munājāt chāhiye

insāf kī ye aañkh ye sūraj kī raushnī

yārab yahī hai din to mujhe raat chāhiye

ham chāhte haiñ dahr meñ jiine kā haq mile

un ko subūt-e-farruḳhī-e-zāt chāhiye

kuchh bhī ho maslahat kā taqāzā magar nadīm

jo dil meñ ho zabāñ pe vahī baat chāhiye

ai zulf-e-nāz koī havā-e-fusūñ kā daam

ahl-e-nazar ko sair-e-tilismāt chāhiye

tāb-e-kamand-e-kākul-e-ḳham-dār hoshiyār

khul kar na har kisī pe 'ināyāt chāhiye

'tāhir' jazā-e-himmat-e-ālī hai zulf-e-yār

zulfoñ se khelne ke liye haat chāhiye

tishna-labon ki nazr ko saughat chahiye

tere nisar thoDi si barsat chahiye

itna bhi mai-kade pe na pahre biThaiye

kuchh to KHayal-e-ahl-e-KHarabaat chahiye

aapas ki guftugu mein bhi kaTne lagi zaban

ab doston se tark-e-mulaqat chahiye

muddat se chashm-o-dil mein koi rabta nahin

kya aur tujh ko gardish-e-haalat chahiye

kis kis KHuda ke samne sajda nahin kiya

kuchh sharm kuchh to aabru-e-zat chahiye

zikr-e-pari-washan ke zamane guzar gae

ab to ghazal mein hamd-o-munajat chahiye

insaf ki ye aankh ye suraj ki raushni

yarab yahi hai din to mujhe raat chahiye

hum chahte hain dahr mein jine ka haq mile

un ko subut-e-farruKHi-e-zat chahiye

kuchh bhi ho maslahat ka taqaza magar nadim

jo dil mein ho zaban pe wahi baat chahiye

ai zulf-e-naz koi hawa-e-fusun ka dam

ahl-e-nazar ko sair-e-tilismat chahiye

tab-e-kamand-e-kakul-e-KHam-dar hoshiyar

khul kar na har kisi pe 'inayat chahiye

'tahir' jaza-e-himmat-e-ali hai zulf-e-yar

zulfon se khelne ke liye hat chahiye