tishnagi-e-lab pe hum aks-e-ab likkhenge

tishnagi-e-lab pe ham aks-e-āb likkheñge

jin kā ghar nahīñ koī ghar ke ḳhvāb likheñge

tum ko kyā ḳhabar is kī zindagī pe kyā biitī

zindagī ke zaḳhmoñ par ham kitāb likkheñge

jis havā ne kaaTī haiñ ḳhāmushī kī zanjīreñ

us havā ke lahje ko inqalāb likkheñge

jhuuT kī parastish meñ umr jin kī guzrī hai

tīrgi-e-shab ko vo āftāb likkheñge

sher kī sadāqat par ham yaqīn rakhte haiñ

maslahat ke chehroñ ko bā-naqāb likkheñge

sūliyoñ pe jhūlegā bad-nihād har munsif

munsifī kā jab bhī ham ḳhud nisāb likkheñge

ġham nahīñ jo ḳhvāboñ kī luT ga.ī haiñ ta.abīreñ

ham nazar ke tāqoñ meñ aur ḳhvāb likkheñge

hirz-e-jāñ samajhte haiñ ham vatan kī miTTī ko

apne ghar ke ḳhāroñ ko ham gulāb likkheñge

is ġhazal ke partav meñ be-gharoñ kī bāteñ haiñ

be-gharoñ ke naam is kā intisāb likkheñge

har dalīl kāTeñge ham dalīl-e-raushan se

'baḳhsh' sau savāloñ kā ik javāb likkheñge

tishnagi-e-lab pe hum aks-e-ab likkhenge

jin ka ghar nahin koi ghar ke KHwab likhenge

tum ko kya KHabar is ki zindagi pe kya biti

zindagi ke zaKHmon par hum kitab likkhenge

jis hawa ne kaTi hain KHamushi ki zanjiren

us hawa ke lahje ko inqalab likkhenge

jhuT ki parastish mein umr jin ki guzri hai

tirgi-e-shab ko wo aaftab likkhenge

sher ki sadaqat par hum yaqin rakhte hain

maslahat ke chehron ko ba-naqab likkhenge

suliyon pe jhulega bad-nihad har munsif

munsifi ka jab bhi hum KHud nisab likkhenge

gham nahin jo KHwabon ki luT gai hain tabiren

hum nazar ke taqon mein aur KHwab likkhenge

hirz-e-jaan samajhte hain hum watan ki miTTi ko

apne ghar ke KHaron ko hum gulab likkhenge

is ghazal ke partaw mein be-gharon ki baaten hain

be-gharon ke nam is ka intisab likkhenge

har dalil kaTenge hum dalil-e-raushan se

'baKHsh' sau sawalon ka ek jawab likkhenge