tishnagi dard thakan soz-e-jigar rakhta hai

tishnagī dard thakan soz-e-jigar rakhtā hai

ik musāfir ka.ī sauġhāt-e-safar rakhtā hai

ye 'ajab daur-e-taraqqī hai ki insāñ har pal

ḳhud se ġhāfil hai magar sab kī ḳhabar rakhtā hai

vo jo nā-vāqif ādāb-e-vafā hai vo bhī

jazb-e-ishq tah-e-qalb-o-jigar rakhtā hai

kaam letā hai jo hālāt kī nākāmī se

apne dāman meñ vahī fat.h-o-zafar rakhtā hai

mere mālik mujhe darkār nahīñ tūl-e-hayāt

'umr de us ko jo jiine kā hunar rakhtā hai

jaane kyā kah diyā us ne dam-e-ruḳhsat mujh se

us kā har lafz qayāmat kā asar rakhtā hai

tere ahbāb se achchhā tirā dushman 'merāj'

tere baare meñ jo pal pal kī ḳhabar rakhtā hai

tishnagi dard thakan soz-e-jigar rakhta hai

ek musafir kai saughat-e-safar rakhta hai

ye 'ajab daur-e-taraqqi hai ki insan har pal

KHud se ghafil hai magar sab ki KHabar rakhta hai

wo jo na-waqif aadab-e-wafa hai wo bhi

jazb-e-ishq tah-e-qalb-o-jigar rakhta hai

kaam leta hai jo haalat ki nakaami se

apne daman mein wahi fath-o-zafar rakhta hai

mere malik mujhe darkar nahin tul-e-hayat

'umr de us ko jo jine ka hunar rakhta hai

jaane kya kah diya us ne dam-e-ruKHsat mujh se

us ka har lafz qayamat ka asar rakhta hai

tere ahbab se achchha tera dushman 'meraj'

tere bare mein jo pal pal ki KHabar rakhta hai