tishnagi mein koi qatra na mayassar aaya

tishnagī meñ koī qatra na mayassar aayā

mar ga.ī pyaas to hisse meñ samundar aayā

jitne ġhavvās the vo tah se na ḳhālī lauTe

jo shanāvar the unheñ haath na gauhar aayā

merī qismat meñ vahī shab vahī zulmat kā guzar

sub.h aa.ī na mirā mehr-e-munavvar aayā

sar jhukāyā to mujhe rauñd ga.ī hai duniyā

sar uThāyā to har ik samt se patthar aayā

vo to ḳhush hai ki mujhe maar girāyā us ne

mujh ko ġham hai ki mirī piiTh pe ḳhanjar aayā

chand hī roz meñ auqāt koī bhuul gayā

gaañv meñ shahr kī poshāk pahan kar aayā

so gayā thak ke har ik biin bajāne vaalā

saañp koī bhī magar bil se na bāhar aayā

pyaar kī raah meñ vo dhuup kī shiddat thī 'zafar'

maiñ bhī ġhash khā ke girā un ko bhī chakkar aayā

tishnagi mein koi qatra na mayassar aaya

mar gai pyas to hisse mein samundar aaya

jitne ghawwas the wo tah se na KHali lauTe

jo shanawar the unhen hath na gauhar aaya

meri qismat mein wahi shab wahi zulmat ka guzar

subh aai na mera mehr-e-munawwar aaya

sar jhukaya to mujhe raund gai hai duniya

sar uThaya to har ek samt se patthar aaya

wo to KHush hai ki mujhe mar giraya us ne

mujh ko gham hai ki meri piTh pe KHanjar aaya

chand hi roz mein auqat koi bhul gaya

ganw mein shahr ki poshak pahan kar aaya

so gaya thak ke har ek bin bajaane wala

sanp koi bhi magar bil se na bahar aaya

pyar ki rah mein wo dhup ki shiddat thi 'zafar'

main bhi ghash kha ke gira un ko bhi chakkar aaya