to ilm wala hai itna to jaanta hoga

to ilm vaalā hai itnā to jāntā hogā

ham achchhe log bure ban ga.e to kyā hogā

maiñ is yaqīn pe tā-umr jiine vaalā huuñ

jahāñ pe kuchh na milegā vahāñ ḳhudā hogā

tū mere saare raqīboñ ke naam jāntī hai

tujhe to merī mohabbat kā bhī patā hogā

ye jitnī tezī se daur-e-jadīd aa rahā hai

havā ke haath meñ bhī ek din diyā hogā

mujhe batāyā thā bachpan meñ ik nujūmī ne

tū jis se pyaar karegā vo be-vafā hogā

maiñ tujh ko yaad bhī kartā huuñ aur nahīñ bhī dost

mirā ye sher bhī zū-ma.anī ban gayā hogā

to ilm wala hai itna to jaanta hoga

hum achchhe log bure ban gae to kya hoga

main is yaqin pe ta-umr jine wala hun

jahan pe kuchh na milega wahan KHuda hoga

tu mere sare raqibon ke nam jaanti hai

tujhe to meri mohabbat ka bhi pata hoga

ye jitni tezi se daur-e-jadid aa raha hai

hawa ke hath mein bhi ek din diya hoga

mujhe bataya tha bachpan mein ek nujumi ne

tu jis se pyar karega wo be-wafa hoga

main tujh ko yaad bhi karta hun aur nahin bhi dost

mera ye sher bhi zu-mani ban gaya hoga