تو اس پہ اور ہمیں شدتوں سے پیار آیا

تو اس پہ اور ہمیں شدتوں سے پیار آیا

ہمارے پاس وہ جب ہو کے بے قرار آیا

وہ جن کو میں نے سکھایا تھا ہنستے رہنے کا فن

انہی کی بزم سے میں آج اشک بار آیا

کسی کو چھوتے ہوئے تھا مجھے کسی کا خیال

میں آج نقش کسی کا کہیں اتار آیا

تمہاری یاد ہی آئی زیادہ تر ہم کو

تمہارا ذکر تو ورنہ بس ایک بار آیا

میں جانتا بھی تھا کوئی نہیں سنے گا مری

کسی کو وقت ضرورت مگر پکار آیا

کبھی ہمیں نے نہیں کی نگاہ اس کی طرف

ہماری راہ میں وہ تو ہزار بار آیا