toD kar hum be-KHudi ki had KHudi tak aa gae

toḌ kar ham be-ḳhudī kī had ḳhudī tak aa ga.e

maut se karke baġhāvat zindagī tak aa ga.e

apnī manzil aap hī ḳhud aa rahe haiñ ab nazar

ho na ho ham aaj apnī raushnī tak aa ga.e

ai ġham-e-ālam tirī is dil-navāzī ke nisār

tere nazdīk aa ke jaise har ḳhushī tak aa ga.e

kyoñ fazāoñ meñ nazar aate haiñ jalvoñ ke ġhubār

kyā mah-o-ḳhurshīd gird-e-ādamī tak aa ga.e

bujh rahī haiñ jin kī ḳhātir ishrateñ kaunain kī

aise ġham bhī kuchh hamārī zindagī tak aa ga.e

ab mohabbat kā har ik ruḳh aa.ina ban jā.egā

aaj ham un kī nigāh-e-be-ruḳhī tak aa ga.e

fitratan ab ho chalā insān fitrat-āshnā

ḳhud gumāñ saare yaqīñ kī raushnī tak aa ga.e

shā.irī kī raah meñ karte hue raushan charāġh

ai 'shifā' ham bhī maqām-e-zindagī tak aa ga.e

toD kar hum be-KHudi ki had KHudi tak aa gae

maut se karke baghawat zindagi tak aa gae

apni manzil aap hi KHud aa rahe hain ab nazar

ho na ho hum aaj apni raushni tak aa gae

ai gham-e-alam teri is dil-nawazi ke nisar

tere nazdik aa ke jaise har KHushi tak aa gae

kyon fazaon mein nazar aate hain jalwon ke ghubar

kya mah-o-KHurshid gird-e-adami tak aa gae

bujh rahi hain jin ki KHatir ishraten kaunain ki

aise gham bhi kuchh hamari zindagi tak aa gae

ab mohabbat ka har ek ruKH aaina ban jaega

aaj hum un ki nigah-e-be-ruKHi tak aa gae

fitratan ab ho chala insan fitrat-ashna

KHud guman sare yaqin ki raushni tak aa gae

shairi ki rah mein karte hue raushan charagh

ai 'shifa' hum bhi maqam-e-zindagi tak aa gae