توڑ کر سینہ مرا ناوک قاتل نکلا

توڑ کر سینہ مرا ناوک قاتل نکلا

حضرت عشق مدد ہو کہ مرا دل نکلا

دوستی کی ہو بھلا کس سے زمانہ میں امید

دشمن جاں مرے پہلو میں مرا دل نکلا

جس کے باعث سے ہوئی دشت نوردی پہلے

پھر مرے پاؤں میں افسوس وہی تل نکلا

تھا اسی شکل پہ یکتائی کا دعویٰ تجھ کو

آئنے میں یہ ترا کون مقابل نکلا

ہجر میں آنکھوں نے یہ قطرۂ خوں ٹپکائے

جس کو چٹکی سے دبایا وہ مرا دل نکلا

حسن یوسف کو تو سن سن کے بہت بگڑے تھے

چاند پر خاک نہ ڈالی جو مقابل نکلا

عاشق حیدر کرار ہوا اس سے شفیقؔ

کوئی دنیا میں نہ حیدر کا مقابل نکلا