toD kar sina mera nawak-e-qatil nikla

toḌ kar siina mirā nāvak-e-qātil niklā

hazrat-e-ishq madad ho ki mirā dil niklā

dostī kī ho bhalā kis se zamāne meñ ummīd

dushman-e-jāñ mire pahlū meñ mirā dil niklā

jis ke baa.is se huī dasht-navardī pahle

phir mire paañv meñ afsos vahī til niklā

thā isī shakl pe yaktā.ī kā da.avā tujh ko

aa.ine meñ ye tirā kaun muqābil niklā

hijr meñ āñkhoñ ne ye qatra-e-ḳhūñ Tapkā.e

jis ko chuTkī se dabāyā vo mirā dil niklā

husn-e-yūsuf ko to sun sun ke bahut bigḌe the

chāñd par ḳhaak na Daalī jo muqābil niklā

āshiq-e-haidar-e-karrār huā is se 'shafīq'

koī duniyā meñ na haidar kā muqābil niklā

toD kar sina mera nawak-e-qatil nikla

hazrat-e-ishq madad ho ki mera dil nikla

dosti ki ho bhala kis se zamane mein ummid

dushman-e-jaan mere pahlu mein mera dil nikla

jis ke bais se hui dasht-nawardi pahle

phir mere panw mein afsos wahi til nikla

tha isi shakl pe yaktai ka dawa tujh ko

aaine mein ye tera kaun muqabil nikla

hijr mein aankhon ne ye qatra-e-KHun Tapkae

jis ko chuTki se dabaya wo mera dil nikla

husn-e-yusuf ko to sun sun ke bahut bigDe the

chand par KHak na Dali jo muqabil nikla

aashiq-e-haidar-e-karrar hua is se 'shafiq'

koi duniya mein na haidar ka muqabil nikla