tujh bewafa ki aah koi chah kya kare

tujh bevafā kī aah koī chaah kyā kare

dil tujh ko de ke tū hī batā aah kyā kare

jis dil-jale kī tujh se lage sham.a-sāñ lagan

sar se vo guzre aur tū vallāh kyā kare

zaarī fuġhāñ o naala sabhī be-asar haiñ aah

is sañg-dil ke dil meñ koī raah kyā kare

is māh-e-kūcha-gard ke ta.iiñ DhūñDhtā huā

har shab galī galī na phire aah kyā kare

yāqūb kī tarah to bahut ro.e dekhiye

ai yūsuf-e-zamāna tirī chaah kyā kare

jaate haiñ sū-e-dair rah-e-kāba chhoḌ kar

haq meñ hamāre dekhiye allāh kyā kare

koī DhūñDhtā katāñ ke ta.iiñ yaaro par hai ġham

miltā kahīñ nahīñ dil-e-āgāh kyā kare

kī dil ne dil-barān-e-jahāñ kī bahut talāsh

koī dil-rubā milā hai na dil-ḳhvāh kyā kare

is kū-e-zulf meñ ai 'jahāñdār' jā phañsā

dil kis tarah se gum na kare raah kyā kare

tujh bewafa ki aah koi chah kya kare

dil tujh ko de ke tu hi bata aah kya kare

jis dil-jale ki tujh se lage shama-san lagan

sar se wo guzre aur tu wallah kya kare

zari fughan o nala sabhi be-asar hain aah

is sang-dil ke dil mein koi rah kya kare

is mah-e-kucha-gard ke tain DhunDhta hua

har shab gali gali na phire aah kya kare

yaqub ki tarah to bahut roe dekhiye

ai yusuf-e-zamana teri chah kya kare

jate hain su-e-dair rah-e-kaba chhoD kar

haq mein hamare dekhiye allah kya kare

koi DhunDhta katan ke tain yaro par hai gham

milta kahin nahin dil-e-agah kya kare

ki dil ne dil-baran-e-jahan ki bahut talash

koi dil-ruba mila hai na dil-KHwah kya kare

is ku-e-zulf mein ai 'jahandar' ja phansa

dil kis tarah se gum na kare rah kya kare