tujh ishq ke mariz ki tadbir shart hai

tujh ishq ke marīz kī tadbīr shart hai

lekin shifā ko gardish-e-taqdīr shart hai

saudā.ī dil ko zulf-e-girah-gīr shart hai

dīvāne ke ilaaj meñ zanjīr shart hai

naale to meñ bahut kiye us but ke sāmne

patthar ke narm karne ko tāsīr shart hai

ho ḳhaak rāh-e-ishq meñ tā-qadr ho tirī

mis ke tilā banāne ko iksīr shart hai

kaafī hai ik ishāra-e-abrū tirā hameñ

kuchh āshiqoñ ke qatl ko shamshīr shart hai

dil kī shikast-o-reḳht kī mere to le ḳhabar

har ghar kī der-pā.ī ko ta.amīr shart hai

kartā hai kis gunah pe uqūbat hameñ tū yaar

ta.azīr ke to vāste taqsīr shart hai

'saudā' maiñ is chaman meñ huuñ juuñ ġhuncha dil-giraft

mātam-sarā meñ sūrat-e-dil-gīr shart hai

tujh ishq ke mariz ki tadbir shart hai

lekin shifa ko gardish-e-taqdir shart hai

saudai dil ko zulf-e-girah-gir shart hai

diwane ke ilaj mein zanjir shart hai

nale to mein bahut kiye us but ke samne

patthar ke narm karne ko tasir shart hai

ho KHak rah-e-ishq mein ta-qadr ho teri

mis ke tila banane ko iksir shart hai

kafi hai ek ishaara-e-abru tera hamein

kuchh aashiqon ke qatl ko shamshir shart hai

dil ki shikast-o-reKHt ki mere to le KHabar

har ghar ki der-pai ko tamir shart hai

karta hai kis gunah pe uqubat hamein tu yar

tazir ke to waste taqsir shart hai

'sauda' main is chaman mein hun jun ghuncha dil-giraft

matam-sara mein surat-e-dil-gir shart hai