تجھ کو چھوا تو غالیہ سائی نہیں گئی

تجھ کو چھوا تو غالیہ سائی نہیں گئی

ہاتھوں سے بوئے نافہ کشائی نہیں گئی

اب زندگی نے راہ میں مخمل بچھا دئے

لیکن ہماری آبلہ پائی نہیں گئی

تجھ سے بچھڑ کے ہم کو زمانہ ہوا مگر

لہجے سے اب بھی نوحہ سرائی نہیں گئی

تجھ کو گنوا کے لوٹے تھے اک شام گھر کو ہم

اب تک وہ شام ہم سے بھلائی نہیں گئی

پھر ہم نے تیرے بعد بھی اک عمر کاٹ لی

پہلے پہل تو شام بتائی نہیں گئی

اپنا بھی عشق مثنوی سحر البیان ہے

لیکن یہ داستان سنائی نہیں گئی