tujhko gila hai tera muqaddar nahin hua

tujh ko gila hai terā muqaddar nahīñ huā

maiñ apne-āp ko bhī mayassar nahīñ huā

honā na honā maiñ ne rakhā apne haath meñ

dam-bhar jahāñ meñ ho gayā dam-bhar nahīñ huā

pahle to qīl-o-qāl meñ hotā nahīñ thā maiñ

phir yuuñ huā ki harf se bāhar nahīñ huā

āñkhoñ ko us kā dekhnā manzūr bhī nahīñ

nāzir hī jo rahā kabhī manzar nahīñ huā

sochā ki apne jism se bāhar bhī ho rahūñ

maiñ uTh ke ḳhaak se bhī huā par nahīñ huā

āḳhir mujhe sarāb ne sairāb kar diyā

maiñ jo samundaroñ se kabhī tar nahīñ huā

hotā rahā vahī jo nahīñ honā chāhiye

honā jo chāhiye thā vo aksar nahīñ huā

ghūmā to apne aap talak aa ke ruk gayā

maiñ dā.era to ho gayā chakkar nahīñ huā

sab ko dikhā.ī de gayā vo husn-e-be-zuhūr

sab par ye lutf ho gayā mujh par nahīñ huā

maiñ kah sakūñ ki dahr meñ vo bhī hai maiñ bhī huuñ

itnā yaqīn mujh ko mayassar nahīñ huā

dastak bhī de ke dekh lī sar bhī paTaḳh liyā

dīvār hī rahā vo kabhī dar nahīñ huā

ġhārat-garī ko dekh ke ahl-e-yaqīn kī

maiñ dekhtā huuñ us ko jo kāfar nahīñ huā

pahlī nazar ko us ne bhī dekhā na ġhaur se

ham se bhī iltifāt mukarrar nahīñ huā

patthar-mizāj hai to miyāñ sang-e-mīl ban

jo rāste meñ ho ke bhī Thokar nahīñ huā

āhista-rau vo aaj bhī apnī ravish pe hai

sab yaar tez ho ga.e 'nayyar' nahīñ huā

tujh ko gila hai tera muqaddar nahin hua

main apne-ap ko bhi mayassar nahin hua

hona na hona main ne rakha apne hath mein

dam-bhar jahan mein ho gaya dam-bhar nahin hua

pahle to qil-o-qal mein hota nahin tha main

phir yun hua ki harf se bahar nahin hua

aankhon ko us ka dekhna manzur bhi nahin

nazir hi jo raha kabhi manzar nahin hua

socha ki apne jism se bahar bhi ho rahun

main uTh ke KHak se bhi hua par nahin hua

aaKHir mujhe sarab ne sairab kar diya

main jo samundaron se kabhi tar nahin hua

hota raha wahi jo nahin hona chahiye

hona jo chahiye tha wo aksar nahin hua

ghuma to apne aap talak aa ke ruk gaya

main daera to ho gaya chakkar nahin hua

sab ko dikhai de gaya wo husn-e-be-zuhur

sab par ye lutf ho gaya mujh par nahin hua

main kah sakun ki dahr mein wo bhi hai main bhi hun

itna yaqin mujh ko mayassar nahin hua

dastak bhi de ke dekh li sar bhi paTaKH liya

diwar hi raha wo kabhi dar nahin hua

ghaarat-gari ko dekh ke ahl-e-yaqin ki

main dekhta hun us ko jo kafar nahin hua

pahli nazar ko us ne bhi dekha na ghaur se

hum se bhi iltifat mukarrar nahin hua

patthar-mizaj hai to miyan sang-e-mil ban

jo raste mein ho ke bhi Thokar nahin hua

aahista-rau wo aaj bhi apni rawish pe hai

sab yar tez ho gae 'nayyar' nahin hua