tujhko kho dene ka ehsas hua tere baad

tujh ko kho dene kā ehsās huā tere ba.ad

DhūñDhtā phirtā huuñ ab terā pata tere ba.ad

phir kisī aur se kī arz-e-tamannā na kabhī

mujh meñ armān na phir koī jagā tere ba.ad

biich raste meñ hameñ chhoḌ ke jaane vaale

e'timād ham ne kisī par na kiyā tere ba.ad

chalte phirte hue patthar haiñ yahāñ ke insāñ

kaun samjhegā bhalā dard mirā tere ba.ad

gardish-e-vaqt jise toḌ nahīñ paa.ī thī

dekh vo shaḳhs bhī ab TuuT gayā tere ba.ad

chāhne vaale mire aur bahut the lekin

maiñ kisī aur kā ho hī na sakā tere ba.ad

phailtā jaatā hai har samt añdherā 'sāgar'

zindagī jaise ho ik bujhtā diyā tere ba.ad

tujh ko kho dene ka ehsas hua tere baad

DhunDhta phirta hun ab tera pata tere baad

phir kisi aur se ki arz-e-tamanna na kabhi

mujh mein arman na phir koi jaga tere baad

bich raste mein hamein chhoD ke jaane wale

e'timad hum ne kisi par na kiya tere baad

chalte phirte hue patthar hain yahan ke insan

kaun samjhega bhala dard mera tere baad

gardish-e-waqt jise toD nahin pai thi

dekh wo shaKHs bhi ab TuT gaya tere baad

chahne wale mere aur bahut the lekin

main kisi aur ka ho hi na saka tere baad

phailta jata hai har samt andhera 'sagar'

zindagi jaise ho ek bujhta diya tere baad