tujhko likhna hai to aisa koi safha likh de

tujh ko likhnā hai to aisā koī saf.ha likh de

jāgte lafzoñ meñ ḳhvāboñ kā sarāpā likh de

pahle jo shakl nahīñ dekhī thī vo sāmne lā

pahle jo naam kitāboñ meñ nahīñ thā likh de

gumbad-e-shab meñ mah-o-najm sajāne vaale

un galī kūchoñ kī qismat meñ darīcha likh de

in likhe lafzoñ meñ likh muzhda na.e mausam kā

kahīñ mahtāb kahīñ gul kahīñ chehra likh de

zard shāḳhoñ meñ na.ī koñpleñ likhne vaale

peḌ se TūTte pattoñ kā bhī nauha likh de

yuuñ bhī tartīb de qissa kabhī fasl-e-gul kā

baaġh meñ sham.a jalā taaq meñ sabza likh de

khīñch de ḳhat na.ī sub.hoñ ke ufuq-tā-ba-ufuq

ḳhāk-tīro ke muqaddar meñ ujālā likh de

khol de āñkhoñ pe darvāza-e-hairat 'qaisar'

harf-e-pinhāñ ke ma.ānī sar-e-parda likh de

tujh ko likhna hai to aisa koi safha likh de

jagte lafzon mein KHwabon ka sarapa likh de

pahle jo shakl nahin dekhi thi wo samne la

pahle jo nam kitabon mein nahin tha likh de

gumbad-e-shab mein mah-o-najm sajaane wale

un gali kuchon ki qismat mein daricha likh de

in likhe lafzon mein likh muzhda nae mausam ka

kahin mahtab kahin gul kahin chehra likh de

zard shaKHon mein nai konplen likhne wale

peD se TuTte patton ka bhi nauha likh de

yun bhi tartib de qissa kabhi fasl-e-gul ka

bagh mein shama jala taq mein sabza likh de

khinch de KHat nai subhon ke ufuq-ta-ba-ufuq

KHak-tiro ke muqaddar mein ujala likh de

khol de aankhon pe darwaza-e-hairat 'qaisar'

harf-e-pinhan ke maani sar-e-parda likh de