تجھ کو معلوم نہیں کیا مرے غم خوار رکھی

تجھ کو معلوم نہیں کیا مرے غم خوار رکھی

ایک عرضی در الفت پہ کئی بار رکھی

تجھ سے ملنے کی تمنا تھی مگر کیا کرتا

وقت نے بیچ میں بارود کی دیوار رکھی

سر نگوں تھا کہ کوئی دیکھ کے آواز نہ دے

عشق نے آ کے مرے سر پہ ہی دستار رکھی

سج رہی تھی پس تخئیل کوئی شوخ غزل

ہم نے کاغذ پہ ترے نام کی تکرار رکھی

نم بھی ہونا نہیں دریا سے گزر جانا بھی

تو نے یہ شرط بھی کیا سوچ کے اے یار رکھی

وجہ رسوائی نہ بن جائے عداوت کل پھر

اس نے غصے کو پیا ہم نے بھی تلوار رکھی

ہم نے اس شاخ تمنا پہ نمو پایا ہے

جس نے ہر رت میں کہانی کوئی تیار رکھی

اذن تھا خانہ بدوشوں کو بھی گویائی کا

ہم بھی محفل میں اٹھے خواہش گفتار رکھی