tujhko pane ke liye KHak-e-tamanna ho jaun

tujh ko paane ke liye ḳhāk-e-tamannā ho jā.ūñ

tere qadmoñ meñ bikhar kar tirā rasta ho jā.ūñ

aur kab tak maiñ karūñ mad.h-sarā.ī apnī

mujh ko taufīq de yā-rab ki maiñ terā ho jā.ūñ

tujh ko koī bhī kabhī mere sivā dekh na paa.e

aañkh meñ bhar luuñ tujhe aur maiñ andhā ho jā.ūñ

chand lamhoñ ke liye ḳhud ko mukammal dekhūñ

be-irāda hī sahī maiñ kabhī yakjā ho jā.ūñ

fikr-e-uqbā na karūñ tujh meñ giraftār rahūñ

shā.erī tere liye maiñ sag-e-duniyā ho jā.ūñ

ye karishma bhī kisī roz to raushan ho jaa.e

tū mirī aarzū meñ terī tamannā ho jā.ūñ

maiñ ki amboh-e-azīzāñ meñ kisī kā bhī nahīñ

zindagī mujh se lipaT jā ki maiñ terā ho jā.ūñ

ye ajab shart hai taslīm-o-razā kī 'aḳhtar'

ḳhud ko pahchānñā chāhūñ to maiñ andhā ho jā.ūñ

tujh ko pane ke liye KHak-e-tamanna ho jaun

tere qadmon mein bikhar kar tera rasta ho jaun

aur kab tak main karun madh-sarai apni

mujh ko taufiq de ya-rab ki main tera ho jaun

tujh ko koi bhi kabhi mere siwa dekh na pae

aankh mein bhar lun tujhe aur main andha ho jaun

chand lamhon ke liye KHud ko mukammal dekhun

be-irada hi sahi main kabhi yakja ho jaun

fikr-e-uqba na karun tujh mein giraftar rahun

shaeri tere liye main sag-e-duniya ho jaun

ye karishma bhi kisi roz to raushan ho jae

tu meri aarzu mein teri tamanna ho jaun

main ki amboh-e-azizan mein kisi ka bhi nahin

zindagi mujh se lipaT ja ki main tera ho jaun

ye ajab shart hai taslim-o-raza ki 'aKHtar'

KHud ko pahchanna chahun to main andha ho jaun