tujhko pane ke liye KHud se guzar tak jaun

tujh ko paane ke liye ḳhud se guzar tak jā.ūñ

aisī jiine kī tamannā hai ki mar tak jā.ūñ

ab na shīshoñ pe girūñ aur na shajar tak jā.ūñ

maiñ huuñ patthar to kisī dast-e-hunar tak jā.ūñ

ik dhuñdlakā huuñ zarā der meñ chhaT jā.ūñgā

maiñ koī raat nahīñ huuñ jo sahar tak jā.ūñ

jis ke qadmoñ ke qasīdoñ se hī fursat na mile

kaise us shaḳhs kī ta.azīm-e-nazar tak jā.ūñ

ghar ne sahrā meñ mujhe chhoḌ diyā thā lā kar

ab ho sahrā kī ijāzat to maiñ ghar tak jā.ūñ

apne mazlūm laboñ par jo vo rakh le mujh ko

aah ban kar maiñ duāoñ ke asar tak jā.ūñ

ai mirī raah koī raah dikhā de mujh ko

dhuup oḌhūñ ki tah-e-shāḳh-e-shajar tak jā.ūñ

tujh ko pane ke liye KHud se guzar tak jaun

aisi jine ki tamanna hai ki mar tak jaun

ab na shishon pe girun aur na shajar tak jaun

main hun patthar to kisi dast-e-hunar tak jaun

ek dhundlaka hun zara der mein chhaT jaunga

main koi raat nahin hun jo sahar tak jaun

jis ke qadmon ke qasidon se hi fursat na mile

kaise us shaKHs ki tazim-e-nazar tak jaun

ghar ne sahra mein mujhe chhoD diya tha la kar

ab ho sahra ki ijazat to main ghar tak jaun

apne mazlum labon par jo wo rakh le mujh ko

aah ban kar main duaon ke asar tak jaun

ai meri rah koi rah dikha de mujh ko

dhup oDhun ki tah-e-shaKH-e-shajar tak jaun