tujhko sochon to tere jism ki KHushbu aae

tujh ko sochoñ to tire jism kī ḳhushbū aa.e

merī ġhazloñ meñ alāmat kī tarah tū aa.e

maiñ tujhe chheḌ ke ḳhāmosh rahūñ sab boleñ

bātoñ bātoñ meñ koī aisā bhī pahlū aa.e

qarz hai mujh pe bahut raat kī tanhā.ī kā

mere kamre meñ koī chāñd na jugnū aa.e

lag ke soī hai koī raat mire siine se

subah ho jaa.e ki jazbāt pe qaabū aa.e

chāhtā huuñ ki mirī pyaas kā mātam yuuñ ho

phir na is dasht meñ mujh sā koī aahū aa.e

us kā paikar ka.ī qistoñ meñ chhape novel sā

kabhī chehra kabhī āñkheñ kabhī gesū aa.e

phir mujhe vazn kiyā jaa.e shahādat ke liye

phir adālat meñ koī le ke tarāzū aa.e

ab ke mausam meñ ye dīvār bhī gir jaa.e 'shakīl'

is tarah jism kī buniyād meñ aañsū aa.e

tujh ko sochon to tere jism ki KHushbu aae

meri ghazlon mein alamat ki tarah tu aae

main tujhe chheD ke KHamosh rahun sab bolen

baaton baaton mein koi aisa bhi pahlu aae

qarz hai mujh pe bahut raat ki tanhai ka

mere kamre mein koi chand na jugnu aae

lag ke soi hai koi raat mere sine se

subah ho jae ki jazbaat pe qabu aae

chahta hun ki meri pyas ka matam yun ho

phir na is dasht mein mujh sa koi aahu aae

us ka paikar kai qiston mein chhape nowel sa

kabhi chehra kabhi aankhen kabhi gesu aae

phir mujhe wazn kiya jae shahadat ke liye

phir adalat mein koi le ke taraazu aae

ab ke mausam mein ye diwar bhi gir jae 'shakil'

is tarah jism ki buniyaad mein aansu aae