tujh pe sab jaan luTane aae hain

tujh pe sab jaañ luTāne aa.e haiñ

ham bhī ḳhud ko gañvāne aa.e haiñ

aaj phir bazm-e-jāmi’a meñ ham

she'r sunñe sunāne aa.e haiñ

ab bhī kuchh log merī mahfil meñ

merā lahja churāne aa.e haiñ

dekh kar mujh ko khol diiñ zulfeñ

aaj phir din suhāne aa.e haiñ

jo kabhī ham se rūThtā hī nahīñ

bas usī ko manāne aa.e haiñ

ab talāsh-e-ma’āsh meñ ham log

chhoḌ kar āshiyāne aa.e haiñ

mere dushman bhī kitne achchhe haiñ

mujh ko apnā banāne aa.e haiñ

chal ke naqsh-e-qadam pe un ke ham

apnī hastī miTāne aa.e haiñ

jo charāġh-e-vafā havāoñ se

bujh ga.e the jalāne aa.e haiñ

merī duniyā ujāḌne vaale

apnī duniyā basāne aa.e haiñ

maiñ yuuñ niklā nahīñ huuñ kamre se

log bas khaTkhaTāne aa.e haiñ

kis ko zauq-e-numū nahīñ 'sāhil'

ham bhī har dil pe chhāne aa.e haiñ

tujh pe sab jaan luTane aae hain

hum bhi KHud ko ganwane aae hain

aaj phir bazm-e-jami’a mein hum

she'r sunne sunane aae hain

ab bhi kuchh log meri mahfil mein

mera lahja churane aae hain

dekh kar mujh ko khol din zulfen

aaj phir din suhane aae hain

jo kabhi hum se ruThta hi nahin

bas usi ko manane aae hain

ab talash-e-ma’ash mein hum log

chhoD kar aashiyane aae hain

mere dushman bhi kitne achchhe hain

mujh ko apna banane aae hain

chal ke naqsh-e-qadam pe un ke hum

apni hasti miTane aae hain

jo charagh-e-wafa hawaon se

bujh gae the jalane aae hain

meri duniya ujaDne wale

apni duniya basane aae hain

main yun nikla nahin hun kamre se

log bas khaTkhaTane aae hain

kis ko zauq-e-numu nahin 'sahil'

hum bhi har dil pe chhane aae hain